ఆచార్య మక్కెన : July 2015

అంతరాత్మ

ఆచార్య మక్కెన శ్రీను 9885219712

పచ్చని చెట్టు కింద కూర్చొని

చిగురుటాకులను చించావు

ముని వేళ్ళతో కొనలనే తెంపావ్

లేత చిగురలను చిదిమివేసావు

మల్లె తీగ దగ్గరకెళ్ళి మొగ్గను

కొన గోటితో నే గిల్లి తుంచావు

విచ్చకుండానే మోడయ్యింది

పరిమళాలు లేకుండా నేల రాలింది

స్వేచ్చగా ఎగిరే తూనీగను పట్టావు

కర్కశ పీడనంతో రెక్క విరిచావు

అచలన జీవిని చూసి చిందులేసావు

విహంగ ఆహ్లాదాన్ని హరింప వేశావు

చిటారు కొమ్మన చిలకే మయ్యింది

చిలకను తెచ్చి పంజరంలో పెట్టావు

పలుకులు నేర్పి పలుచన చేసింది

కులుకులు వదిలి కుయుక్తులు చెప్పింది

ప్రకృతి చెప్పే పాటాలు వద్దంటున్నావు

ఆకృతి లేని కృత్రిమాలే కావాలంటున్నావు

వికృతి దాల్చిన మనసును పెంచావు

జాగృతి మరచి మనుగడ సాగిస్తున్నావు

చేసిన తప్పులు ఎక్కడి కెళతాయి

నిను వెంటాడుతూ వెన్నంటి ఉంటాయ్

నీలో అలజడి రేపుతూనే ఉంటాయి

ఆత్మ పరిశీలన అడుగుతూనే ఉంటాయి

నిబ్బరంగా నిలిపి ఉంచు నీలో సహనం

మనసంత పూర్తిగా నింపుకో సున్నితత్వం

ఒప్పులు చేసి నవ్వుతు గొప్పగా బతుకు

అంత రాత్మ ఎప్పుడు నీకు తోడు ఉంటుంది

*****

Tuesday 7 July 2015